జాతీయం
'వీబీ- జీ రామ్ జీ' కింద 375 గ్రామీణ పనులకు కేంద్రం ఆమోదం
08-10-2026 09:38
'వీబీ-జీ రామ్ జీ' చట్టం 2025 కింద 375 రకాల గ్రామీణ పనులకు కేంద్రం ఆమోదం తెలుపుతూ నోటిఫికేషన్ విడుదల చేసింది. గతంతో పోలిస్తే పనుల జాబితా 41 శాతం పెరిగింది. నాలుగు విభాగాలలో నీటి భద్రతకే అత్యధికంగా 128 పనులు కేటాయించారు. గ్రామసభ ఆమోదంతో రూపొందే ఈ ప్రాజెక్టుల ద్వారా గ్రామీణ ఉపాధి, శాశ్వత మౌలిక వసతుల కల్పనే లక్ష్యమని కేంద్రం తెలిపింది.
xPress24, delhi, October 7,
వికసిత్ భారత్ - గ్యారెంటీ ఫర్ రోజ్‌గార్ అండ్ ఆజీవికా మిషన్ (VB-G RAM G) చట్టం, 2025 కింద అనుమతించదగిన పనుల నూతన షెడ్యూల్‌ను కేంద్ర ప్రభుత్వం నోటిఫై చేసింది. నూతన గ్రామీణ పనుల కార్యాచరణ చట్రం కింద మొత్తం 375 రకాల పనులకు అనుమతి కల్పించినట్లు కేంద్ర గ్రామీణాభివృద్ధి మంత్రిత్వ శాఖ వెల్లడించింది. గతంలో అమల్లో ఉన్న 266 పనులతో పోలిస్తే ఇది 41 శాతం పెరుగుదల అని స్పష్టం చేసింది. గ్రామీణ ప్రాంతాల్లో ఉపాధి కల్పనతో పాటు శాశ్వత ఆస్తుల సృష్టి, సమగ్ర గ్రామీణాభివృద్ధే ధ్యేయంగా ఈ నిర్ణయం తీసుకున్నట్లు తెలిపింది.
నాలుగు ప్రధాన విభాగాలు.. నీటి భద్రతకు పెద్దపీట
ఈ నూతన పనులను నాలుగు కీలక రంగాల కింద పునర్వ్యవస్థీకరించారు. అవి నీటి భద్రత (Water Security), కీలక గ్రామీణ మౌలిక వసతులు (Core Rural Infrastructure), జీవనోపాధి సంబంధిత మౌలిక సదుపాయాలు (Livelihood-related Infrastructure), అలాగే తీవ్ర వాతావరణ పరిస్థితులు - విపత్తు సంసిద్ధత ప్రత్యేక పనులు (Disaster Preparedness). వీటిలో అత్యధికంగా 'నీటి భద్రత' విభాగానికి 128 పనులను కేటాయించారు. ఇందులో చెక్ డ్యామ్‌లు, గల్లీ ప్లగ్‌లు, అండర్‌గ్రౌండ్ డ్యామ్‌లు, రీఛార్జ్ షాఫ్ట్‌లు, ఇంజెక్షన్ వెల్స్, నదులు-వాగుల పునరుజ్జీవనం, ముంపు భూముల పునరుద్ధరణ వంటి పనులు ఉన్నాయి.
ప్రతి పనీ గ్రామసభ ఆమోదించే 'వికసిత్ గ్రామ పంచాయత్ ప్లాన్' ద్వారా వికేంద్రీకృత పద్ధతిలో ఖరారవుతుందని, వీటిని 'వికసిత్ భారత్ నేషనల్ రూరల్ ఇన్‌ఫ్రాస్ట్రక్చర్ స్టాక్' ద్వారా డిజిటల్‌గా పర్యవేక్షిస్తారని మంత్రిత్వ శాఖ స్పష్టం చేసింది. 2047 నాటికి వికసిత్ భారత్ లక్ష్యాన్ని సాధించే దిశగా ఇది కీలక ముందడుగు అని పేర్కొంది.