వారాణసి నుంచి వడ్ నగర్ వరకు ద్విచక్రవాహన యాత్ర చేపట్టిన సేవా యాత్రికులతో ప్రధాని మోదీ ముఖాముఖి

xPress24, Delhi, September 25, ‘సేవా సంకల్ప్ అభియాన్’లో భాగంగా వారాణసి నుంచి వడ్ నగర్ వరకు ద్విచక్రవాహన యాత్ర చేపట్టిన సేవా యాత్రికులతో ప్రధానమంత్రి నరేంద్ర మోదీ వీడియో కాన్ఫరెన్స్ ద్వారా ప్రత్యేకంగా సంభాషించారు. ఈ సందర్భంగా యాత్రికులను ఉద్దేశించి ప్రసంగించిన ప్రధాని.. గ్రామాల్లో పర్యటించడం వల్ల క్షేత్రస్థాయిలోని వాస్తవ పరిస్థితులు, కేంద్ర ప్రభుత్వ సంక్షేమ పథకాలు సామాన్య ప్రజల జీవితాల్లో తెచ్చిన సానుకూల మార్పులను స్వయంగా ప్రత్యక్షంగా తెలుసుకునే అరుదైన అవకాశం లభిస్తుందని పేర్కొన్నారు. వడ్ నగర్ సంస్కారాన్ని నేర్పితే.. కాశీ సేవను నేర్పింది: ప్రధాని తన స్వస్థలమైన వడ్ నగర్ తనకు సంస్కారాన్ని నేర్పిస్తే, తన కర్మభూమి అయిన కాశీ నిస్వార్థమైన సేవా భావాన్ని అందించిందని ప్రధాని మోదీ భావోద్వేగంగా స్మరించుకున్నారు. అంత్యోదయ సిద్ధాంతకర్త పండిత్ దీన్ దయాళ్ ఉపాధ్యాయ జయంతిని పురస్కరించుకుని ఆయన సమాజానికి చేసిన సేవలను ఈ సందర్భంగా ప్రధాని కొనియాడారు. రాజకీయ నాయకులు కేవలం ఎన్నికలు, ఓటు బ్యాంకులకే పరిమితం కాకూడదని, నిరంతరం సమాజ సంక్షేమం, మార్పు కోసం కృషి చేయాలని స్పష్టం చేశారు. పారిశుద్ధ్య కార్మికులకు సమాజంలో సముచిత గౌరవం, గుర్తింపు ఇవ్వడం ప్రతి పౌరుడి బాధ్యత అని ఆయన పునరుద్ఘాటించారు. సుదీర్ఘంగా సాగే ఈ యాత్రలో పాల్గొనే ప్రతి ఒక్కరూ రహదారి భద్రతా నిబంధనలను కచ్చితంగా పాటిస్తూ, హెల్మెట్ తప్పనిసరిగా ధరించాలని యాత్రికులకు హితవు పలికారు. Byte: నరేంద్ర మోదీ, భారత ప్రధానమంత్రి