శాంతియుత పోరాటాలే సామాజిక మార్పునకు మార్గం: బీఆర్ఎస్ అధినేత కేసీఆర్

xPress24, Hyderabad, October 2, సహనంతో కూడిన ప్రజాస్వామిక పోరాటాల ద్వారానే శాశ్వత సామాజిక మార్పు సాధ్యమవుతుందని జాతిపిత మహాత్మా గాంధీ నిరూపించారని బీఆర్ఎస్ అధినేత, మాజీ ముఖ్యమంత్రి కే.చంద్రశేఖర్ రావు పేర్కొన్నారు. గాంధీ జయంతి సందర్భంగా రాష్ట్ర ప్రజలకు శుభాకాంక్షలు తెలిపిన ఆయన, దేశ స్వాతంత్ర్య సాధన కోసం బాపూజీ చేసిన మహోన్నత త్యాగాలను స్మరిస్తూ నివాళులర్పించారు. విద్వేషపూరిత ఆలోచనలను వీడి, శాంతి, సౌభ్రాతృత్వాలతో కూడిన సుపరిపాలన అందించడమే గాంధీజీకి మనం ఇచ్చే నిజమైన నివాళి అని స్పష్టం చేశారు. తెలంగాణ ఉద్యమానికి గాంధేయ మార్గమే స్ఫూర్తి: కేసీఆర్ మహాత్మా గాంధీ అనుసరించిన ప్రజాస్వామిక, శాంతియుత పోరాట పంథానే తెలంగాణ రాష్ట్ర సాధన ఉద్యమంలో తనకు మార్గదర్శకంగా నిలిచిందని కేసీఆర్ గుర్తుచేశారు. తెలంగాణ కోసం తాను ఒంటరిగా ప్రస్థానాన్ని ప్రారంభించిన నాటి నుంచి ఎన్ని ఆటంకాలు, కష్టాలు ఎదురైనా సంయమనం, స్థితప్రజ్ఞతతో ముందుకు సాగడంలో గాంధేయ స్ఫూర్తి ఇమిడి ఉందని పేర్కొన్నారు. న్యాయమైన ప్రజల ఆకాంక్షల సాధన కోసం నిరంకుశ విధానాలపై పోరాడే ప్రతి నాయకుడు విశాల దృక్పథంతో కార్యాచరణను రూపొందించుకోవాలనే తాత్వికతను బాపూజీ జీవితం నుంచే నేర్చుకోవాలని తెలిపారు. ఐక్యత, శాంతియుత పాలన దిశగా సాగాలి సమాజంలోని అన్ని వర్గాలను సమన్వయం చేస్తూ, ప్రజల్లో చైతన్యాన్ని నింపుతూ, శాంతియుత మార్గంలో ప్రజా ఉద్యమాలను నిర్మించాలనే గాంధీజీ సిద్ధాంతం నేటి తరానికి ఆచరణీయమని కేసీఆర్ వివరించారు. కక్షపూరిత వైఖరులను, విద్వేషపూరిత ప్రసంగాలను పక్కనబెట్టి, సర్వజనుల సంక్షేమం కోసం పాటుపడడమే ప్రజాస్వామ్య వ్యవస్థల కర్తవ్యమని ఆయన పునరుద్ఘాటించారు.