శ్రీకాకుళం జిల్లా సమగ్రాభివృద్ధిపై మంత్రి అచ్చెన్నాయుడు సమీక్ష

xPress24, Srikakulam, October 1, శ్రీకాకుళం, అక్టోబర్ 1: శ్రీకాకుళం జిల్లా సమగ్రాభివృద్ధి, సంక్షేమ పథకాల అమలు, గ్రామీణ ప్రాంతాల్లో మౌలిక వసతుల కల్పనపై రాష్ట్ర వ్యవసాయ శాఖ మంత్రి కింజరాపు అచ్చెన్నాయుడు అధికారులతో సమీక్ష నిర్వహించారు. జిల్లా కలెక్టర్ స్వప్నిల్ దినకర్ పుండ్కర్, జాయింట్ కలెక్టర్ ఫర్మాన్ అహ్మద్ ఖాన్‌లతో గురువారం ప్రత్యేకంగా సమావేశమైన మంత్రి.. జిల్లాకు సంబంధించిన పలు అభివృద్ధి అంశాలపై సుదీర్ఘంగా చర్చించారు. రాష్ట్ర ప్రభుత్వం అమలు చేస్తున్న వివిధ సంక్షేమ కార్యక్రమాలు, పథకాల ప్రయోజనాలు అర్హులైన ప్రతి లబ్ధిదారుడికి పూర్తిస్థాయిలో అందేలా చర్యలు చేపట్టాలని మంత్రి అధికారులను ఆదేశించారు. గ్రామీణ ప్రాంతాల్లో చేపడుతున్న మౌలిక వసతుల అభివృద్ధి పనులను వేగవంతం చేయడంతో పాటు వాటి పురోగతిని ఎప్పటికప్పుడు పర్యవేక్షించాలని సూచించారు. రైతుల సంక్షేమానికి సంబంధించిన కార్యక్రమాలు, ప్రభుత్వ పథకాల అమలుపై ప్రత్యేక దృష్టి సారించాలని అచ్చెన్నాయుడు అధికారులకు సూచించారు. అర్హులైన ప్రతి రైతుకు ప్రభుత్వ పథకాల ప్రయోజనాలు అందేలా క్షేత్రస్థాయిలో అధికారులు సమన్వయంతో పనిచేయాలని పేర్కొన్నారు. ప్రభుత్వం కొత్తగా మంజూరు చేయనున్న పింఛన్లు, నివాస గృహాల ప్రయోజనాలు అర్హులైన లబ్ధిదారులకు పారదర్శకంగా అందేలా ముందస్తు కార్యాచరణ ప్రణాళిక రూపొందించాలని మంత్రి సూచించారు. లబ్ధిదారుల ఎంపిక, పథకాల అమలులో పారదర్శకతకు ప్రాధాన్యం ఇవ్వాలని అధికారులను ఆదేశించారు.