సింగరేణిని ప్రైవేట్ పరం చేసేందుకు ప్రభుత్వం ప్రయత్నిస్తోంది: ఈటెల రాజేందర్

xPress24, Ramagundam, October 1, సింగరేణి సంస్థను నిర్వీర్యం చేసేందుకు ప్రయత్నాలు జరుగుతున్నాయని బీజేపీ ఎంపీ ఈటెల రాజేందర్ అన్నారు. పెద్దపల్లి జిల్లా గోదావరి ఖనీలో ఈటెల రాజేందర్ మీడియాతో మాట్లాడారు. ఒకప్పుడు సింగరేణి సంస్థలో లక్షా 16 వేల మంది కార్మికులు ఉండగా.. ఇప్పుడు 39 వేలకు తగ్గిందని తెలిపారు. తెలంగాణలోనే అతిపెద్ద ప్రభుత్వ రంగ సంస్థ అయిన సింగరేణిలోని అన్ని విభాగాలను ప్రైవేట్ పరం చేసేందుకు కాంగ్రెస్ ప్రభుత్వం ప్రయత్నిస్తోందని ఎంపీ ఆరోపించారు. ఓపెన్ కాస్ట్ గనుల్లో మట్టిని వెలికి తీసేందుకు మాత్రమే ప్రైవేట్ కాంట్రాక్టర్లను అనుమతించేవారని..కానీ ఇప్పుడు ఆ పంతా మారిందని వ్యాఖ్యానించారు. ప్రస్తుతం సింగరేణి ఉద్యోగులకు జీతాలు కూడా ఇవ్వలేని స్థితిలో ఉందన్నారు. సింగరేణికి రావాల్సిన 70 వేల కోట్ల రూపాయలను తక్షణమే చెల్లించాలని ఈటెల రాజేందర్ డిమాండ్ చేశారు. కాంగ్రెస్ అనాలోచిత నిర్ణయాలతో తెలంగాణలో పంట పొలాలు ఎండిపోతున్నాయని అన్నారు. ప్రాజెక్టుల నుంచి వచ్చే నీటిని సక్రమంగా వినియోగించకపోవడం వల్లే కరెంట్ కష్టాలు ఎక్కువయ్యాయని పేర్కొన్నారు. బైట్- ఈటెల రాజేందర్, ఎంపీ, మల్కాజ్ గిరి