సీజేఐపై వివాదాస్పద పోస్టు, సుప్రీంకోర్టులో నిరసనలపై కోర్టు ధిక్కార పిటిషన్

xPress24, Delhi, October 13, సుప్రీంకోర్టు ప్రధాన న్యాయమూర్తి జస్టిస్ సూర్యకాంత్‌ను లక్ష్యంగా చేసుకుని కేరళ కాంగ్రెస్ చేసిన వివాదాస్పద సోషల్ మీడియా పోస్టుతో పాటు సుప్రీంకోర్టు ప్రాంగణంలో ఇండి కూటమి నేతల నిరసనలపై సుమోటో క్రిమినల్ కోర్టు ధిక్కార చర్యలు చేపట్టాలని సుప్రీంకోర్టు న్యాయవాది వినీత్ జిందాల్ సీజేఐకి ఫిర్యాదు చేశారు. న్యాయస్థానం భద్రత, సజావుగా సాగే కార్యకలాపాలకు విఘాతం కలిగించేలా వ్యవహరించిన వారిపై చట్టపరమైన చర్యలు తీసుకోవాలని  కోరారు. సీజేఐ రాజీనామా చేయాలంటూ పోస్టు.. భద్రతా నిబంధనల ఉల్లంఘనపై విచారణకు విజ్ఞప్తి ఇటీవల కేరళ కాంగ్రెస్ అధికారిక ఎక్స్  ఖాతాలో.. "లా అండ్ ఆర్డర్ మీ పరిధి కాకపోతే ఇప్పుడే రాజీనామా చేయండి.. ఆ బాధ్యతను సమర్థంగా నిర్వహించే వారిని మేము చూసుకుంటాం" అంటూ పోస్టు చేసి ఆ తర్వాత తొలగించింది. ఈ పోస్టు సాధారణ రాజకీయ విమర్శల పరిధిలోకి వస్తుందా లేక కోర్టు ధిక్కార చట్టం-1971 సెక్షన్ 2(సి) కిందకు వస్తుందా అనేది పరిశీలించాలని జిందాల్ పేర్కొన్నారు. రాజ్యాంగంలోని ఆర్టికల్ 129 ప్రకారం సుప్రీంకోర్టు సుమోటోగా ధిక్కార చర్యలు ప్రారంభించాలని విజ్ఞప్తి చేశారు. అలాగే రాహుల్ గాంధీ, ఇతర ఇండి కూటమి నేతలు పిటిషన్ దాఖలు చేసే సమయంలో నిషిద్ధ ప్రాంతాల్లోకి అనుమతి లేకుండా ప్రవేశించారా, నినాదాలతో కోర్టు విధులకు ఆటంకం కలిగించారా అనే అంశంపై సీసీటీవీ ఫుటేజీ, భద్రతా రికార్డులను పరిశీలించాలని కోరారు. రేపు ప్రస్తావించండి అన్న సీజేఐ.. పోలీసుల ఎఫ్‌ఐఆర్‌లు ఈ అంశంపై సీనియర్ న్యాయవాది గౌరవ్ భాటియా మంగళవారం ధర్మాసనం ముందు ప్రస్తావించగా, ఈ అంశం మెన్షనింగ్ లిస్టులో లేకపోవడంతో రేపు ప్రస్తావించాలని సీజేఐ సూచించారు. మరోవైపు, సీజేఐ రాజీనామా చేయాలంటూ వ్యాఖ్యానించడాన్ని సుప్రీంకోర్టు బార్ అసోసియేషన్ (SCBA), సుప్రీంకోర్టు అడ్వకేట్స్-ఆన్-రికార్డ్ అసోసియేషన్ (SCAORA) తీవ్రంగా ఖండించాయి. కాగా, నిబంధనలు ఉల్లంఘించి నిరసన ప్రదర్శన నిర్వహించిన ఘటనపై ఢిల్లీ పోలీసులు తిలక్ మార్గ్, మందిర్ మార్గ్, బారాఖంబా స్టేషన్లలో మొత్తం నాలుగు ఎఫ్‌ఐఆర్‌లు నమోదు చేశారు.