సిద్దిపేట జిల్లాలో ప్రాచీన తాళపత్రాలు, రాతప్రతుల పరిరక్షణకు 'జ్ఞాన భారత్ మిషన్'

xPress24, Siddipet, October 2, భారతదేశంలోని ప్రాచీన, అరుదైన తాళపత్రాలు, చేతిరాత ప్రతులు, పాండులిపులను శాస్త్రీయ పద్ధతిలో సంరక్షించి డిజిటలైజ్ చేయడమే లక్ష్యంగా కేంద్ర ప్రభుత్వం 'జ్ఞాన భారత్ మిషన్' కార్యక్రమాన్ని చేపట్టిందని సిద్దిపేట జిల్లా అదనపు కలెక్టర్ (రెవెన్యూ) లక్ష్మీ కిరణ్ తెలిపారు. జిల్లా పరిధిలోని ప్రజల వద్ద ఉన్న ఇలాంటి అపురూప సాంప్రదాయ జ్ఞాన సంపదను సేకరించి, డిజిటలైజేషన్ ప్రక్రియ పూర్తయిన తర్వాత తిరిగి యజమానులకే అప్పగిస్తామని స్పష్టం చేశారు. ఎవరి వద్దనైనా ప్రాచీన గ్రంథాలు, పత్రాలు ఉంటే కలెక్టరేట్‌లోని అదనపు కలెక్టర్ రెవెన్యూ కార్యాలయంలో అందజేయాలని సూచించారు. ప్రాచీన విజ్ఞానాన్ని భవిష్యత్ తరాలకు అందించడమే లక్ష్యం భారతదేశంలో వేల సంవత్సరాలుగా వివిధ భాషలు, లిపుల్లో నిక్షిప్తమైన చరిత్ర, సాహిత్యం, ఆయుర్వేదం, ఖగోళశాస్త్రం, తత్వశాస్త్రం, కళలు, సంస్కృతికి సంబంధించిన అమూల్యమైన సమాచారాన్ని భద్రపరచడమే ఈ జాతీయ స్థాయి మిషన్ ప్రధాన ఉద్దేశమని అదనపు కలెక్టర్ వివరించారు. ‘సంరక్షణ - డిజిటలైజేషన్ - ప్రాప్యత - పరిశోధన’ అనే విధానంలో మాన్యుస్క్రిప్టుల గుర్తింపు, జాబితా తయారీ, మెటాడేటా రూపకల్పన చేపట్టి ప్రజలందరికీ డిజిటల్ రూపంలో అందుబాటులోకి తెస్తారని చెప్పారు. మన ప్రాచీన విజ్ఞాన వారసత్వాన్ని అంతర్జాతీయ స్థాయిలో పరిశోధనలకు అనువుగా తీర్చిదిద్దేందుకు ప్రతి ఒక్కరూ భాగస్వాములు కావాలని కోరారు. బైట్ లక్ష్మీ కిరణ్, జిల్లా అదనపు కలెక్టర్ (రెవెన్యూ), సిద్దిపేట