సమాఖ్య-2026’ గ్లోబల్ బిజినెస్ మీట్ ప్రారంభం

xPress24, Hyderabad, October 14, హైదరాబాద్‌లోని హైటెక్స్ వేదికగా ‘సమాఖ్య-2026’ గ్లోబల్ బిజినెస్ మీట్ ఘనంగా జరిగింది. ఈ సదస్సుకు ముఖ్యమంత్రి రేవంత్‌రెడ్డి హాజరై అధికారికంగా ప్రారంభించారు. ఈ సందర్భంగా సమాఖ్య నిర్వహిస్తున్న కార్యక్రమాలను, చేస్తున్న కృషిని సీఎం అభినందించారు. అనంతరం ఆయన మాట్లాడుతూ.. రాష్ట్ర జనాభా శాతాన్ని మించి తెలంగాణ దేశ జీడీపీకి (GDP) తన వంతు వాటాను అందిస్తోందని గర్వంగా వెల్లడించారు. అలాగే రాష్ట్రంలో మహిళలను వ్యాపారవేత్తలుగా తీర్చిదిద్దేందుకు ప్రభుత్వం ప్రత్యేక కృషి చేస్తోందని తెలిపారు. కాంగ్రెస్ ప్రభుత్వానికి ఎలాంటి 'పాలసీ పెరాలసిస్' లేదని సీఎం రేవంత్‌రెడ్డి స్పష్టం చేశారు. మంచి విధానాలతో (పాలసీలతో) పెట్టుబడులు పెట్టేందుకు ముందుకు వచ్చే ఎవరినైనా ప్రోత్సహించడానికి తమ ప్రభుత్వం సిద్ధంగా ఉందని పేర్కొన్నారు. అంతర్జాతీయ స్థాయిలో నిర్వహించిన ఈ సదస్సులో అమెరికా (US), బ్రిటన్ (UK), యూఏఈ (UAE), ఈయూ (EU) దేశాలకు చెందిన ప్రతినిధులు, పారిశ్రామికవేత్తలు పెద్ద సంఖ్యలో పాల్గొన్నారు.