స్వర్ణ పతకం సాధించడం ఎంతో సంతోషాన్నిస్తోంది: తిలక్ వర్మ

xPress24, Hyderabad, October 5, జపాన్ వేదికగా జరిగిన 2026 ఏషియన్ గేమ్స్ పురుషుల టీ20 క్రికెట్‌లో భారత జట్టు అద్భుత ప్రదర్శనతో స్వర్ణ పతకాన్ని కైవసం చేసుకుని బ్యాక్-టు-బ్యాక్ ఛాంపియన్‌గా నిలిచింది. హోరాహోరీగా సాగిన ఫైనల్ పోరులో సాంప్రదాయ ప్రత్యర్థి పాకిస్థాన్‌ను 19 పరుగుల తేడాతో చిత్తు చేసి భారత్ పసిడి పతకాన్ని ముద్దాడింది. మొదట బ్యాటింగ్ చేసిన భారత జట్టు నిర్ణీత 20 ఓవర్లలో 211/6 భారీ స్కోరు సాధించగా, ఆ తర్వాత లక్ష్యచేధనకు దిగిన పాకిస్థాన్ 20 ఓవర్లలో 192/6 పరుగులకే పరిమితమైంది. 2023 చైనా ఏషియన్ గేమ్స్ తర్వాత మళ్లీ 2026 జపాన్ వేదికగా కూడా భారత్ తమ బంగారు పతకాన్ని విజయవంతంగా నిలబెట్టుకోవడంతో దేశవ్యాప్తంగా క్రీడాభిమానులు హర్షం వ్యక్తం చేస్తున్నారు. ఆసియా గేమ్స్ విజయవంతంగా ముగిసిన అనంతరం భారత యువ క్రికెటర్ తిలక్ వర్మ హైదరాబాద్ చేరుకున్నారు. ఈ సందర్భంగా ఆయన మాట్లాడుతూ... ఏషియన్ గేమ్స్‌‌లో వరుసగా రెండోసారి స్వర్ణ పతకం సాధించడం ఎంతో సంతోషాన్నిస్తోందని ఆనందం వ్యక్తం చేశారు. జపాన్‌లో తాము ఆడడం ఇదే తొలిసారి కావడంతో అక్కడి పిచ్, వాతావరణ పరిస్థితులకు అలవాటు పడటం కొంత సవాలుగా అనిపించిందని పేర్కొన్నారు. ఫైనల్ పోరులో తిలక్ వర్మ కేవలం 22 బంతుల్లోనే 3 ఫోర్లు, 4 సిక్సర్లతో 51 పరుగులు చేసి నాటౌట్‌గా నిలిచి భారత జట్టు విజయంలో నిర్ణయాత్మక పాత్ర పోషించారు.