హైదరాబాద్‌లో ప్రశాంతంగా కొనసాగుతున్న గణేష్ నిమజ్జనం – భారీ పోలీసు బందోబస్తు

హైదరాబాద్ లో గణేష్ నిమజ్జన వేడుకలు ప్రశాంతంగా కొనసాగుతున్నాయి. బాలాపూర్ నుంచి హుస్సేన్‌సాగర్ వరకు 18 కిలోమీటర్ల యాత్రకు పోలీసులు భారీ బందోబస్తు ఏర్పాటు చేశారు. 28 వేల మంది పోలీసులు, 8వేల 142 మంది అదనపు సిబ్బందితో పాటు 42 ప్లాటూన్లు, 4 RAF, 2 CRPF కంపెనీల కేంద్ర బలగాలను మోహరించారు. నిఘా కోసం 10 వేల సీసీ కెమెరాలు, ట్యాంక్‌బండ్ చుట్టూ 100 హైరైజ్ కెమెరాలు, 24 డ్రోన్లతో సాంకేతిక పర్యవేక్షణ చేపట్టారు. మహిళల భద్రత కోసం 26 షీ-టీమ్స్ విధులు నిర్వర్తిస్తున్నాయి. నగరంలో నాలుగు ప్రాంతాల్లో ప్రత్యేక కంట్రోల్ రూమ్‌లు ఏర్పాటు చేశారు. హుస్సేన్‌సాగర్ చుట్టూ 40కి పైగా క్రేన్లను మోహరించారు. NTR మార్గ్, నెక్లెస్ రోడ్, ట్యాంక్‌బండ్‌పై రేపు ఉదయం 10 గంటల వరకు ట్రాఫిక్ ఆంక్షలు అమలులో ఉంటాయని పోలీసులు తెలిపారు. ప్రజల సౌకర్యార్థం హైదరాబాద్ మెట్రో సర్వీసుల సమయాలను రాత్రి 1 గంట వరకు పొడిగించారు.