హుస్సేన్‌సాగర్ తీరానికి ఖైరతాబాద్ పంచముఖ మహాగణపతి

xPress24, Hyderabad, September 25, హైదరాబాద్ మహానగరంలో వినాయక నిమజ్జన మహోత్సవం అత్యంత కోలాహలంగా సాగుతోంది. నగర ప్రజలతో పాటు తెలుగు రాష్ట్రాల భక్తులు ఎంతో ఆసక్తిగా ఎదురుచూస్తున్న ఖైరతాబాద్‌ శ్రీ పంచముఖ సంకటహర మహా గణపతి శోభాయాత్ర అట్టహాసంగా కొనసాగింది. స్వామివారిని దర్శించుకునేందుకు, శోభాయాత్రలో అడుగులు వేసేందుకు భక్తులు, యువత లక్షలాదిగా తరలివచ్చారు. 'గణపతి బప్పా మోరియా' నినాదాలు, డప్పు వాయిద్యాలు, భక్తుల జయజయధ్వానాల నడుమ మహాగణనాథుడు సాగరం వైపు కదిలాడు. టెలిఫోన్ భవన్, డాక్టర్ బీఆర్ అంబేద్కర్ సచివాలయం, ఎన్టీఆర్ మార్గ్ మీదుగా శోభాయాత్ర సాగి.. హుస్సేన్‌సాగర్ వద్ద ప్రత్యేకంగా ఏర్పాటు చేసిన క్రేన్ నెంబర్ 4 వద్దకు చేరుకుంది. జనసంద్రంగా సచివాలయం, ట్యాంక్‌బండ్ పరిసరాలు బడా గణేష్ శోభాయాత్ర సందర్భంగా సచివాలయం, ట్యాంక్‌బండ్, ఎన్టీఆర్ మార్గ్ పరిసర ప్రాంతాలు భక్తజన సంద్రంగా మారాయి. ఎక్కడా ఎలాంటి తొక్కిసలాట జరగకుండా పోలీసులు ముందస్తుగా ఏడు ప్రత్యేక కంపార్ట్‌మెంట్లను ఏర్పాటు చేయగా, అవన్నీ భక్తులతో కిక్కిరిసిపోయాయి. భద్రతా సిబ్బంది, జీహెచ్‌ఎంసీ, ట్రాఫిక్ పోలీసులు సమన్వయంతో వ్యవహరిస్తూ శోభాయాత్రను సాఫీగా ముందుకు నడిపించారు. మరికాసేపట్లో గంగమ్మ ఒడికి మహాగణపతి నిర్దేశిత సమయానికే ఖైరతాబాద్ మహా గణనాథుడి నిమజ్జనాన్ని పూర్తి చేసేందుకు అధికారులు, క్రేన్ నిపుణుల బృందం యుద్ధప్రాతిపదికన సన్నాహాలు చేస్తున్నారు. క్రేన్ నెంబర్ 4 వద్ద భారీ క్రేన్ సహాయంతో విగ్రహాన్ని క్రమపద్ధతిలో పైకి లేపి నిమజ్జనం చేసే ప్రక్రియ కొనసాగుతోంది. మరికొద్ది క్షణాల్లోనే 69 అడుగుల భారీ పంచముఖ మహాగణపతి గంగమ్మ ఒడికి చేరనున్నాడు.